27-уми ноябри соли 2025 дар толори меҳмонхонаи «Таҷ Палас»-и шаҳри Душанбе бо ҷалби мутахассисони соҳа ва иштироки кормандони шуъбаҳои дастгоҳи марказии Хадамоти шиносномавию бақайдгирии Вазорати корҳои дохилӣ семинари омӯзишӣ баргузор карда шуд.
Чорабинии маърифатии мазкур бо дастгирии Раёсати Комиссарии Олии СММ оид ба паноҳандагон дар Тоҷикистон ва ташкилоти ҷамъиятии «Инсон ва Адолат» доир карда шуда, баҳри баланд бардоштани савияи дониш ва малакакаи касбии кормандоне, ки ба ҳуҷҷатгузории самти бақайдгирӣ ва будубоши шаҳрвандони хориҷӣ ва шахсони бешаҳрванд, махсусан бо шахсони паноҳҷӯянда ва гуреза сару кор доранд, равон карда шуда буд.
Пас аз сухани ифтитоҳии намояндагони Хадамоти шиносномавию бақайдгирӣ ва ташкилоти ҷамъиятии «Инсон ва Адолат» мутахассисони соҳа, дотсенти кафедраи ҳуқуқи маъмурӣ ва фаъолияти маъмурии факултети №2 Академияи Вазорати корҳои дохилӣ подполковники милитсия Суфӣ Нуриддинзода дар мавзӯи «Варақаи бақайдгирӣ: мафҳумҳо, аҳамият ва тартиби пур кардани он» ва сардори шуъбаи таҳлилӣ-назоратӣ ва ҳуқуқии ХШБ ВКД Ҷумҳурии Тоҷикистон полковники милитсия Хисрав Солиҳӣ дар мавзӯи «Тартиби ҳуҷҷатгузорӣ (аз ҷумла дар мисоли тартиби додани шаҳодатномаи муваққатӣ ба шахсони паноҳҷӯянда ва шаҳодатномаи гурезагӣ) ва риояи имлои забони давлатӣ дар ин раванд» баромад намуданд.
Баромадкунандагон доир ба тартиби ҳуҷҷатгузорӣ дар Хадамоти шиносномавию бақайдгирӣ, тартиби барасмиятдарории варақаҳои бақайдгирӣ, шаҳодатномаи муваққатии паноҳҷуянда ва шаҳодатномаи гурезагӣ дар Ҷумҳурии Тоҷикистон, маълумоти дар он қайдшаванда ва дигар кори ҳуҷҷатгузории самти фаъолият дар чорчӯбаи қонунгузории амалкунанда ибрози назар намуда, ҳангоми суҳбатҳои озод таваҷҷуҳи иштирокчиёни семинарро, ки дар ин самтҳо таҷрибаи амалӣ доранд, ҷалб намуданд.
Пас аз омӯзиши санадҳои меъёрии ҳуқуқии тартиби додан, иваз намудан, супоридан, тамдид, нобуд сохтани ҳуҷҷатҳои дахлдори соҳа, инчунин дигар масъалаҳое, ки ба гирифтан ва истифодаи онҳо вобаста аст, талабот ва ҷавобгарӣ нисбати нигоҳдории ҳуҷҷатҳо, инчунин ба талаботи Қоидаҳои имлои забони тоҷикӣ ва Аломатҳои китобати забони тоҷикӣ зимни ҳуҷҷатгузорӣ диққат дода шуд. Ҳамчунин, иштирокчиёни семинар бо санадҳои меъёрии танзимкунандаи кор бо дигар ҳуҷҷатҳои тасдиқкунандаи шахсияти шаҳрвандони Ҷумҳурии Тоҷикистон, асосҳои ба расмият даровардан, додан, иваз кардан, барқарор намудан, беэътибор донистан, супоридан, гирифтан ва нобуд кардани онҳоро муқаррар менамояд, шинос гардиданд.
Аз натиҷаи баромадҳо ва таклифу пешниҳодҳои манзургардида ҷиҳати беҳтару хубтар ба роҳ мондани фаъолият дар самти таҳияи ҳуҷҷатҳои дахлдори соҳаи шиносномавию бақайдгирӣ қарорҳои дахлдор қабул карда шуданд.
Х. Солиҳӣ, Т.Латипов