Бо дастгириҳои ҳамаҷониба ва ғамхориҳои пайвастаи Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон нисбати кормандони мақомоти корҳои дохилӣ ва саъю кўшишҳои пайвастаи Вазири корҳои дохилӣ генерал-полковники милитсия Раҳимзода Рамазон Ҳамро, имрўз сохтори мақомоти корҳои дохилӣ мукаммалу пуриқтидор гардида, тамоми ҷузъу томҳои он бо беҳтарин шароити хизмативу маишӣ, техникаву таҷҳизоти муосири корбарӣ, иншооти маъмурии замонавӣ таъмин гардидаанд. Аз ҷумла, миёни дигар воҳидҳои поёнии мақомоти корҳои дохилӣ, Хадамоти шиносномавию бақайдгирии ВКД ва тамоми бахшҳои он низ аз ин дастгириҳо бархурдор буда, бо беҳтарин таҷҳизоти корбарӣ ва шароити хуби хизматӣ таъмин гардидаанд. – мегўяд сардори Бюрои суроғавӣ-маълумотдиҳии Хадамоти шиносномавию бақайдгирии Вазорати корҳои дохилӣ подполковники милитсия Абдуғаффор Фаттозода.
Роҳбарият ва ҳайати шахсии Бюрои суроғавӣ-маълумотдиҳӣ, ки яке аз воҳидҳои таркибии Хадамоти шиносномавию бақайдгирии ВКД мебошад, бо мақсади ба танзим даровардан ва баланд бардоштани самаранокии самти фаъолияти хизматӣ, инчунин тақвият додани тартиботи ҳуқуқӣ, тибқи талаботи қисми 2-и моддаи 22-и Қонуни Ҷумҳурии Тоҷикистон «Дар бораи санадҳои меъёрии ҳуқуқӣ» аз 26-уми марти соли 2009, дар асоси банди 12-и «Низомномаи Вазорати корҳои дохилии Ҷумҳурии Тоҷикистон», инчунин Дастурамал оид ба корҳои суроғавӣмаълумотдиҳии Хадамоти шиносномавию бақайдгирии ВКД, фаъолияти худро дуруст ба роҳ мондаанд.
Мавриди қайд аст, ки имрўз, дар баробари амалӣ намудани корҳои суроғавӣ-маълумотдиҳӣ, ки самти асосии фаъолияти кормандони Бюрои суроғавӣ-маълумотдиҳии ХШБ мебошад, ҳамзамон воҳидҳои зертобеи он дар раёсатҳои ВКД дар вилоятҳои Суғду Хатлон, Раёсати минтақавии милитсияи шаҳру навоҳии Кўлоб ва Вилояти Мухтори Кўҳистони Бадахшон низ дар ҷодаи фаъолияти худ ба натиҷаҳои назаррас ноил гардидаанд.
Кормандони Бюрои суроғавӣ-маълумотдиҳӣ амалӣ намудани баргардони (картотекаи) алифбои суроғавӣ-маълумотдиҳиҳоро, ки аз варақаҳои омад ва баромади истиқоматкунандагони вилоятҳо, шаҳру ноҳияҳо ва умуман, аз тамоми қаламрави ҷумҳурӣ ирсол мегарданд, инчунин варақаҳои ҷустуҷўии маҳаллӣ ва байнидавлатиро ба уҳда доранд.
Мавсуф зимни суҳбат иброз дошт, ки бо мақсади таъмини иҷрои талаботи қарори Ҳукумати Ҷумҳурии Тоҷикистон аз 30 декабри соли 2011 “Дар бораи Консепсияи ташаккули Ҳукумати электронӣ дар Ҷумҳурии Тоҷикистон” ва дар самти рақамикунонии соҳа, дар Хадамоти шиносномавию бақайдгирӣ ва воҳидҳои поёнии он Низоми иттилоотии «Шиносномадиҳӣ ва бақайдгирӣ» насб ва ҷорӣ карда шудааст, ки дар доираи барномаи мазкур як қатор корҳо ба сомон расонида шудаанд.
Бо дастгириҳои бевоситаи Вазири корҳои дохилӣ генералполковники милитсия Раҳимзода Рамазон Ҳамро ва кўшишҳои пайвастаи роҳбарияти Хадамоти шиносномавию бақайдгирии ВКД, баҳри боз ҳам самаранок гардонидани самти фаъолияти хизматии кормандони Бюрои суроғавӣмаълумотдиҳӣ ва воҳидҳои поёнии он дар вилоятҳо бо таҷҳизотҳои муосири корбарӣ ва дастгоҳҳои нави системаи автоматикунонӣ таъмин гардида, махзани ягонаи бақайдгирии маълумотҳо роҳандозӣ шудааст.
Аз ҷумла, дар ҳашт моҳи сипаришудаи соли равон аз ҷониби ҳайати шахсии Бюрои суроғавӣ-маълумотдиҳӣ ва бо ҷалби мутахассисони соҳа, ба махзани ягонаи автоматикунонидашудаи иттилоотии БСМ, ки аз ҷониби хадамотҳои шиносномавию бақайдгирӣ ирсол шудаанд, 304240 варақаҳои омад ва баромад ворид карда шудаанд.
Инчунин, ба баргадони варақаҳои омад ва баромади БСМ дар ин муддат зиёда аз 189 ҳазор адад ворид ва ҷобаҷо гузошта шудаанд. – Дар ин самт корҳо идома дошта, саъй дорем сари вақт ва бо сифати баланд вазифаҳои дар наздамон гузошташударо иҷро намоем, – гуфт подполковники милитсия Абдуғаффор Фаттозода.
Мақсад аз роҳандозӣ намудани системаи автоматикунонӣ, пеш аз ҳама муттамарказонидани ҳуҷҷатҳои воридгардида, ба таври автоматӣ бақайдгирӣ, баҳисобгирӣ ва коркарди маълумотҳо дар раванди бақайдгирии шаҳрвандон буда, ҳамчунин барои баланд бардоштани сатҳи хизматрасонӣ ба шаҳрвандон, сохторҳои қудратии ҷумҳурӣ, ташкилоту муассисаҳое, ки ба Бюрои суроғавӣ-маълумотдиҳӣ бо дархост муроҷиат менамоянд, дар кўтоҳтарин фурсат маълумоти дуруст пешниҳод намоянд.
Раҷаббек ИЛЁСЗОДА