Тавре ҳамагон медонем, мо имрӯзҳо дар арафаи як ҷашнвораи бузургу дастоварди бебаҳои миллати тоҷик, яъне Истиқлолияти давлатии Ҷумҳурии Тоҷикистон қарор дорем. Аввалан мехостам аз номи худ ва кормандони шуъбаи корҳои раводидӣ ва бақайдгирии Хадамоти шиносномавию бақайдгирии Вазорати корҳои дохилӣ ба ин муносибат тамоми мардуми кишвари азизамонро, бо ин рӯзи фаромӯшнашаванда табрику муборакбод гуфта, барояшон саломатӣ, хонаободӣ ва хушиҳои рӯзгорро таманно менамоям.
Бояд гуфт, бо ба даст овардани Истиқлолияти давлатӣ миллати тоҷик таҳти сарварии Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, баҳри пойдориву қавӣ гардидани пояҳои давлатдорӣ, волоияти қонун ва дар арсаи байналмилалӣ шинохта шудани Ватани азизамон аз сидқи дил заҳмат кашида, яктану якҷон шуданд.
Бояд гуфт таҳти сиёсати хирадмандонаву бунёдкоронаи Сарвари давлатамон тамоми соҳаҳои иқтисодиву иҷтимоӣ, фарҳангиву маданӣ, шароити хизмативу иҷтимоии сохторҳои қудратии кишвар ва сатҳи зиндагии ҷомеа ба маротиб афзудааст, ки ин дастовардҳо боиси хушнудии ҳар яки мост, мегӯяд сардори шуъбаи корҳои раводидӣ ва бақайдгирии Хадамоти шиносномавию бақайдгирии Вазорати корҳои дохилӣ полковники милитсия Шавкат Рашидзода.
Мавсуф зимни суҳбат иброз дошт, ки имрӯз ҳар як ҷузъу томи ВКД бо дастгириву ғамхориҳои ҳамешагии Сарвари давлат, Ҳукумати Ҷумҳурӣ ва кӯшишу заҳматҳои шабонарӯзии Вазири корҳои дохилӣ генерал-полковники милитсия Раҳимзода Рамазон Ҳамро ҳамқадами замон гардида, зина ба зина рушду такмил ёфта, сар карда аз дастгоҳи марказӣ то ба дурдасттарин воҳиди он бо биноҳои наву замонавӣ, ҳуҷраҳои кории муҷаҳҳаз бо техникаву таҷҳизоти муосири корбарӣ ва воситаҳои нақлиёти ҷавобгӯ ба талаботи замон муҳайё мебошанд.
Мавсуф қайд кард, ки аз ҷумла кормандони шуъбаи корҳои раводидӣ ва бақайдгирии Хадамоти шиносномавию бақайдгирии ВКД бо тамоми шароити хизматӣ ба монанди компютеру таҷҳизоти чопӣ, дастгоҳҳои муосири аксбардорӣ, таҷҳизоти электронии изи ангуштгиранда ва дигар лавозимоти корбарӣ таъмин гардидаанд.
Инчунин, сардори Хадамоти шиносномавию бақайдгирии Вазорати корҳои дохилӣ полковники милитсия Ҷомӣ Мирзозода пайваста аз хизматбарии кормандони бахш, пешрафту дастовардҳо ва сатҳи хизматрасонии кормандон бархурдор буда, кӯшиш менамояд ҳар як воҳиди ХШБ ВКД дар сатҳи зарурӣ дар доираи қонунҳои амалкунанда ва вазифаҳои ба зиммадоштааш ба аҳолӣ хизматбарӣ намоянд.
Дар баробари ҳама ин дастгириҳо, кормандони шуъба самти фаъолияти хизматии худро дучанд намуда, нишондодҳои кории худро баланд мебардоранд ва пайваста дар чорабиниҳои сатҳи шаҳриву ҷумҳуриявӣ фаъолона хизматбарӣ менамоянд.
Вақте аз нишондодҳои хизматӣ ёдовар гардидем, қайд кардан ба маврид аст, ки дар зарфи ҳафт моҳи сипаришудаи соли равон аз ҷониби кормандони шуъба ҳамагӣ 13028 нафар шаҳрвандони хориҷиро, ки ба ҷумҳурӣ бо корҳои шахсӣ, барои фаъолияти меҳнатӣ ё тиҷоратӣ, барои истиқомати доимӣ ё ин ки барои донишомӯзӣ ворид шудаанд, ба қайд гирифтанд, ки ин нишондод нисбат ба ҳамин давраи соли гузашта 846 нафар зиёд мебошад ва аз ин теъдоди умумии шаҳрвандони хориҷии бақайдгирифташуда беш аз 100 нафари онҳо ҳамчун сайёҳ мебошанд.
Инчунин, муҳлати бақайдгирии 4336 нафари онҳо тамдид карда шудааст.
Дар давраи ҳисоботӣ аз тарафи кормандони шуъба ба 66927 нафар шаҳрвандон шиносномаҳои умумишаҳрвандии хориҷии дорои маълумоти электронӣ дода шудааст, ки нисбат ба ҳамин давраи соли гузашта 6186 адад зиёд мебошад.
Ҳамзамон, бояд қайд кард, ки бештари шаҳрвандони хориҷӣ ва ё даъваткунандагони онҳо барои сари вақт ба қайд гузоштан ва ё тамдид намудани муҳлати будубоши онҳо дар қаламрави Ҷумҳурии Тоҷикистон саҳлангорӣ намуда ба хатогиҳо роҳ медиҳанд.
Масалан, аз аввали сол то ба имрӯз зиёда аз 300 нафар шаҳрвандони хориҷӣ барои вайрон намудани қонунгузории Ҷумҳурии Тоҷикистон ба ҷавобгарии маъмурӣ кашида шудаанд, инчунин 22 нафар роҳбарони корхонаву ташкилотҳое, ки шаҳрвандони хориҷиро даъват намудаанду дар ҳуҷҷатгузории онҳо саҳлангорӣ намудаанд, низ тибқи қонунгузорӣ ба ҷавобгарии маъмурӣ кашида шудаанд.
Сардори шуъбаи корҳои раводидӣ ва бақайдгирии Хадамоти шиносномавию бақайдгирии Вазорати корҳои дохилӣ полковники милитсия Шавкат Рашидзода дар охир қайд намуд, ки кормандони шуъба фаъолияти хизматии худро хуб ба роҳ монда, саъй доранд ба дастовардҳои нав ба нави хизматӣ ноил гарданд ва ҳарчи хубтару беҳтар ба шаҳрвандон хизматрасонӣ намоянд.
Дар баробари ҳама ин дастгириҳои Ҳукумати мамлакат, роҳбарияти ВКД тамоми донишу малакаи касбии худро баҳри ошкору пешгирии қонуншиканӣ, ҳифзи тартиботи ҷамъиятӣ, волоияти қонун ва пойдории Истиқлолияти давлатӣ, сулҳу осоиштагии Ватани азизамон равона намудаанд.
Р. ИЛЁСЗОДА,
Т. ЛАТИПОВ