Рӯзи 26-уми августи соли 2025 дар Хадамоти шиносномавию бақайдгирии Вазорати корҳои дохилӣ бо намояндагони вилояти Томски Федератсияи Россия вохӯрӣ баргузор гардид.
Ҳайати намояндагони вилояти Томск, ки бо даъвати Вазорати меҳнат, муҳоҷират ва шуғли аҳолии кишвар ба Ҷумҳурии Тоҷикистон ташриф оварда буданд, аз муовини губернатори вилояти Томск оид ба сиёсати иҷтимоӣ Грузных Светлана Николаевна, муовини сардори Департаменти меҳнат ва шуғли аҳолии вилояти Томск Шаманина Ольга Викторовна, директори Маркази тестӣ аз забони русӣ барои хориҷиёни Донишкадаи таҳсилоти фосилавии Донишгоҳи давлатии Томск Гладущенко Юлия Валерьевна, сардори Маркази пешгирии ҳуқуқвайронкуниҳои ДДТ, директори Маркази ҳамоҳангсозии Донишгоҳи политехникии Томск Ерофеевский Андрей Игоревич ва раиси ташкилоти ҷамъиятии минтақавии дастгирии шаҳрвандони Тоҷикистон дар вилояти Томск бо номи “Иттиҳод” Ахмедов Рафик Мирзохомидович иборат буданд.
Меҳмононро муовини сардори Хадамоти шиносномавию бақайдгирӣ полковники милитсия Раҷабзода Боймаҳмад Шариф хайрамақдам гуфта, ба роҳ мондани ҳамкориҳоро бо идораҳои давлатии вилояти Томск дар самтҳои дахлдор, аз ҷумла дар пешгирии муҳоҷирати ғайриқонунӣ муҳим арзёбӣ намуд.
Ҷониби вилояти Томск зимни суханрониашон аз таасуроташон ба мавзеҳои Тоҷикистон, меҳмоннавозии мардуми тоҷик иброз дошта, ҷиҳати пешгирии хароҷоти зиёдатӣ оид ба ташкил ва кушодани нуқтаҳои омӯзиши забони русӣ дар шаҳрҳои калони Тоҷикистон, тартиби қабули тести забони русӣ қабл аз сафари муҳоҷирони меҳнатӣ ба Федератсияи Россия дар дохили Тоҷикистон, омӯзиши фосилавии забони русӣ, таъсиси портали омӯзишӣ ва маълумотгирӣ, ба роҳ мондани корҳои иттилоотӣ дар самти будубоши қонунӣ дар ҳудуди Россия андешаронӣ намуданд.
Таклифу пешниҳодҳои меҳмонон мусбӣ қабул карда шуда, татбиқи онро дар ҳамоҳангӣ бо вазорату идораҳои марбутаи ду кишвар муҳим донистанд.
Вохӯрӣ дар фазои дӯстию ҳамдигарфаҳмӣ доир гардида, туҳфаҳои хотиравӣ ба вохӯрӣ ҳусни анҷом бахшид.
Х. Солиҳӣ